Гатуем па-беларуску

Беларуская нацыянальная кухня мае сваю даўнюю традыцыю. З глыбіні стагоддзяў дайшлі да нашых дзён многія самабытныя стравы. Галоўнай адметнай рысай нашай кухні з’яўляецца шырокае выкарыстанне другога хлеба, нашай карміцелькі – бульбы. Стравы з бульбы практычна не сыходзяць са стала беларусаў ў любую пару года.

Але не меншым попытам у беларусаў карыстаюцца стравы, прыгатаваныя з мяса, рыбы, крупяных вырабаў, малочных, мучных і іншых прадуктаў. Сёння, мой чытач, я раскажу табе пра некаторыя з іх. І можа, пазнаёміўшыся з рэцэптамі нашых продкаў, нехта з гаспадынь разам са мной прыгатуе ў нядзельны дзень для сям’і менавіта гэтыя старажытныя нацыянальныя стравы. На першае ў нас сёння будзе “Крупнік”. Крупы (пярловая, ячневая ці пшано) перабіраем, прамываем, насыпаем ў каструлю з кіпнем і даводзім памешваючы да гатоўнасці. За 10 хвілін да гатоўнасці пакладзіце ў развараны крупяны кулеш парэзаную скрылькамі бульбу. Запраўце смажанай на сале (альбо шмальцы) цыбуляй, укіньце лаўровы лісцік, пасаліце і дадайце спецыі па смаку. Падаюць крупнік у глыбокай глінянай місачцы, прысыпаўшы дробна парэзанай зелянінай. На другое прыгатуем святочную страву нашых бабуль “Пячыста”. Нехта з вас можа і не чуў ніколі гэту назву.

А гатуецца пячыста проста. Буйны кавалак мяса (цяляціну, альбо свініну), націраем соллю, перцам, каляндрай, здробленым часнаком, смажым з дабаўленнем тлушчу на адкрытай патэльні ў печы, ці ў духоўцы, расклаўшы вакол кавалка мяса цэлую бульбу. Салодкая страва “Кулага” завершыць наш нядзельны абед. Свежыя (можна і замарожаныя) чарніцы альбо клубніцы ці журавіны зварыць. Калі ягады разварацца дадаем 2-3 лыжкі мукі, разведзенай невялікай колькасцю вады, мёд альбо цукар, даводзім кулагу да кансыстэнцыі густога кісяля. Падаем з малаком, белым хлебам ці блінамі (як вопытная гаспадыня прадукты бяру “на вока”).
Для вас гатавала Зоя Гарбачова