ЧЫМ ЖЫЛА КАРМЯНШЧЫНА

27 сакавіка 1955 года. У калгасе «Бальшавік» уступіў у строй калгасны радыёвузел. Устаноўлена новая апаратура, якая забяспечвае бесперабойную работу.
Зараз калгаснікі штодзённа слухаюць радыёперадачы з Масквы, Мінска. Перад мікрафонам выступаюць перадавікі калгаснай вытворчасці.

31 сакавіка 1955 года. 27 сакавіка калектыў рабочых і служачых Кармянскай МТС адзначыў 20-годдзе арганізацыі сваёй станцыі. На ўрачыстым сходзе, прысвечаным знамянальнай даце, лепшыя людзі МТС, якія працуюць з дня яе заснавання, прэміраваны каштоўнымі падарункамі.

27 сакавіка 1975 года. Нядаўна ў Баравабудскай сярэдняй школе адбылася сустрэча вучняў з чэмпіёнам Алімпійскіх гульняў 1972 года і свету 1974 года па веславанню на байдарках і каноэ Мікалаем Гарбачовым. Заслужаны майстар спорту СССР расказаў прысутным аб сваёй спартыўнай біяграфіі і аб тым, як ён стаў чэмпіёнам свету і Алімпіяды, за што быў узнагароджаны ордэнам «Знак Пашаны», чым займаецца зараз, адказаў на шматлікія пытанні.
Затым чэмпіён свету і Алімпійскіх гульняў уручыў групе вучняў значкі Усесаюзнага фізкультурнага комплексу «Гатоў да працы і абароны СССР».

5 сакавіка 1985 года. Вялікая дружба ў рабят школы-інтэрната з аматарамі спорту філіяла №2 Рэчыцкага вытворчага ткацкага аб’яднання «Чырвоны Кастрычнік». Зараз праводзяцца сумесныя трэніроўкі валейбалістаў пад кіраўніцтвам інструктара філіяла Ю.Машчонскага.
Рабочыя прадпрыемства падарылі рабятам хакейныя вароты і вучні з задавальненнем займаюцца любімым відам спорту.

12 сакавіка 1985 года. «Запрасілі ветэранаў» – пад такім дэвізам у Залатамінскай школе праходзяць піянерскія зборы, камсамольскія сходы, вечары, прысвечаныя 40-годдзю Вялікай Перамогі.
Камсамольцы 8 класа запрасілі да сябе на «агеньчык» ветэрана Вялікай Айчыннай вайны В.Д. Спадабаева.
Ганаровы госць «агеньчыка» В.Д.Спадабаеў расказаў васьмікласнікам аб сваім юнацтве, апаленым віхурай вайны.
Падрыхтавала
Кармянская цэнтральная бібліятэка