Фестываль народнага гумару прайшоў у Калінкавіцкім раёне

Дзевяты Рэспубліканскі фестываль народнага гумару “Аўцюкі” прайшоў па-святочнаму – шумна і весела, натхнёна і звонка, шчыра і з выдумкай, смешна і з гумарам.

Яго гасцямі сталі дэлегацыі Брэстчыны і Віцебшчыны, Гродзеншчыны і Магілёўшчыны, Міншчыны і Гомельшчыны, а таксама з блізкага і далёкага замежжа – з украінскага горада Славуціч і малдаўскага Унгены, пабрацімаў горада Калінкавічы, а яшчэ з Габрава – балгарскай сталіцы гумару. Прайшлі канцэрты і конкурсныя выступленні, творчыя выставы.

Фестываль праходзіў 13-14 верасня. У першы дзень прайшлі святочныя канцэрты з удзелам майстроў мастацтваў рэспублікі ў Малых і Вялікіх Аўцюках, Сыродзе, Юравічах, Каплічах і Бабровічах. Тым часам у саміх Калінкавічах працавала адкрытая пляцоўка кінатэатра “Знамя”, дзе дэманстравалася камедыя “Свежына з салютам” Нацыянальнай кінастудыі “Беларусьфільм”.

Асноўны дзень фестывалю пачаўся традыцыйнай прэс-канферэнцыяй з удзелам гасцей, арганізатараў, кіраўнікоў дэлегацый, членаў журы і прадстаўнікоў сродкаў масавай інфармацыі. Сярод ганаровых гасцей, якія ўвайшлі ў Аргкамітэт і журы, на фестывалі былі таксама дэпутат Палаты прадстаўнікоў Нацыянальнага сходу Рэспублікі Беларусь Яўгеній Адаменка і дэпутат абласнога Савета дэпутатаў Дзмітрый Згурскі.

На прэс-канферэнцыі Уладзімір Ліпскі прапанаваў у якасці дэвізу чарговага дзевятага фестывалю словы: “Давайце смяяцца весела!”. Таму што без народнага гумару, без іскрамётнага смеху, па словах “хроснага бацькі” фестывалю, нельга ў жыцці. Толькі такі настрой перамагае сум і натхняе чалавека. Уладзімір Ліпскі нагадаў, што яго першая кніга называлася “Аповесць пра Каласкоў і Калінак, якія гаруюць і жартуюць” і адзначыў, што менавіта ў гэтым уся соль – у здольнасці ўспрымаць любую сітуацыю з гумарам. “Смейцеся! – заклікаў пісьменнік. – Не па-чорнаму, а па-добраму – на сабой, над суседам, над рознымі абставінамі. Гэта і будзе той смех, пра які ў народзе кажуць: на здароўе!”.

Цэнтральнай пляцоўкай правядзення свята народнага гумару стала плошча імя Леніна ў Калінкавічах. Але ўсё пачалося, як і заўсёды, у Аўцюках. І перш чым намеснік старшыні аблвыканкама Уладзімір Прывалаў абвясціў фестываль адкрытым, у аграгарадку Малыя Аўцюкі прайшла ўрачыстая цырымонія адкрыцця памятнага знака пад назвай “Аўцюкоўскі глобус”.

Самі Калінкавічы на адзін дзень ператварыліся ў адзіную фестывальную пляцоўку. Чаго тут толькі не было! Гандлёвыя рады, атракцыёны, горад майстроў з удзелам цэнтраў рамёстваў з Брагіна і Петрыкава, Лельчыцаў і Ельска, Мазыра і Калінкавічаў, выстаўка фатаграфій пад назвай “Аўцюкоўская фотасушка” раённай газеты «Калiнкавiцкiя навiны», на якой былі прадстаўлены лепшыя моманты з папярэдніх фестываляў. Тут жа працавалі фотапляцоўкі «Галоўны герой нумара» і «Гумар у фармаце сэлфi». Ну і, безумоўна, знакамітая аўцюкоўская “Мытня”, якая адкрывала дарогу на падворкі гасцям і ўдзельнікам фестывалю. А яшчэ – прэзентацыя турыстычных маршрутаў пад назвай «Добра там, дзе нас няма», выстаўка стылізаванай аўта- і мотатэхнікі “Аўцюкоўскія драндулеты”, катанне на коніку “Ліпскім”, палатка “салёных” анекдотаў (конкурсныя выступленні ў намінацыях “анекдот” і “частушка”), сельскагаспадарчая латарэя “Злаві ўдачу” і аўцюкоўская юшка “Вуха з яршовага пятуха”, дзіцячая пляцоўка “Аўцюкоўскі ералаш”, арт-фантан, выстаўка-продаж кніг Уладзіміра Ліпскага і спартыўная пляцоўка “Аўцюкоўскія спартыўныя гульні”.

Аднак спачатку гледачы віталі ўдзельнікаў свята – дэлегацыі абласцей Беларусі: народны клуб аматараў песні, гумару і гульні “Вечарніца” і народны тэатр мініяцюр “Вастраўчане” (Брэсцкая вобласць), народны тэатр сатыры і гумару “Фанограф” (Віцебская вобласць), народны фальклорны гурт “Жывіца” (Віцебская вобласць), народны тэатр мініяцюр “Люстэрка жыцця” (Мінская вобласць), народны тэатр “Прамень” (Магілёўская вобласць), народны тэатр народнага гумару “Вясёлыя аўцюкоўцы”, творчыя калектывы з Лельчыцкага і Ельскага раёнаў (Гомельская вобласць). Пасля шэсця-параду і прывітанняў ад дэлегацый перад галоўнай сцэнай сустракалі картэж у суправаджэнні аўтамабіляў Дзяржаўтаінспекцыі, на якім прыехалі старшыні Малааўцюкоўскага, Вялікааўцюкоўскага і Сыродскага сельвыканкамаў Міхаіл Дулуб, Андрэй Баравік і Таццяна Барысенка. Разам з імі прыехалі трое дзетак – ад кожнага населенага пункта. У руках яны трымалі тры маленькія глобусы, на якіх адзначаны населеныя пункты Малыя і Вялікія Аўцюкі і Сырод. Адзін з іх быў урачыста ўручаны старшыні райвыканкама Сяргею Гваздзю, другі – Уладзіміру Ліпскаму, а трэці вырашылі перадаць таму, каго вызначыць журы фестывалю. (Ужо падчас узнагароджання пераможцаў і прызёраў фестывалю Уладзімір Ліпскі ўручыў гэты падарунак на памяць дэлегацыі з Габрава.)

Ад кіраўніцтва Гомельскай вобласці і асабіста губернатара Генадзя Салаўя прывітальны адрас зачытаў Уладзімір Прывалаў. Ён жа абвясціў фестываль адкрытым.

Прывітальны адрас ад Міністэрства культуры Рэспублікі Беларусь зачытаў кансультант упраўлення устаноў культуры і народнай творчасці  Іван Галабурда. На адкрыцці фестывалю званнем “Ганаровы аўцюк” ушанавалі Міхаіла Дрынеўскага, Уладзіміра Радзівілава і старшыню СВК “Дружба-Аўцюкі” Сяргея Даўгялу.

Фестываль народнага гумару пачаўся конкурснай праграмай творчых калектываў і выканаўцаў у намінацыях «Тэатр мініяцюр», «Гумарыстычная песня» і «Гумарыстычны танец».

Не менш цікавым і захапляльным стаў конкурс прыгажосці, а, дакладней, сельскай прастаты, пад назвай «Міс Аўцюкі-2019».

Шмат шчырых усмешак і радасных эмоцый выклікалі выступленні творчых калектываў Мазырскага, Ельскага, Лельчыцкага Кармянскага, Брагінскага, Петрыкаўскага, Гомельскага і Акцябрскага раёнаў, а таксама тэатра гумару “Хрыстафор”, якія выходзілі на галоўную сцэну ў канцэртнай праграме фестывалю.

А на гарадскім стадыёне ў “футболе па-аўцюкоўскі” спрачаліся паміж сабой Каласкі і Калінкі. Застаецца пашкадаваць, што такі захапляльны спектакль убачылі не ўсе гледачы фестывалю. На галоўнай сцэне ў гарадскім парку праходзіў раённы сельгаспраект “Уладар сяла”.

Тым часам журы фестывалю шчыравала над падвядзеннем вынікаў выступленняў творчых калектываў і асобных выканаўцаў у розных намінацыях. У намінацыі “Тэатр мініяцюр” пераможцам рэспубліканскага фестывалю народнага гумару ўжо ў каторы раз быў прызнаны народны тэатр народнага гумару “Вясёлыя аўцюкоўцы” Калінкавіцкага цэнтра адпачынку.

На гэтым было аб’ялена, што ІХ Рэспубліканскі фестываль народнага гумару “Аўцюкі” ўрачыста закрываецца. Між тым свята працягвалася концертнай програмай з удзелам Сашы Нэма и шоу-балета «Сенсацыя» (г. Мінск), а пасля святочнага феерверка – дыскатэкай з удзелам артыстаў прадзюсерскага цэнтра ARTbiz (г. Гомель).

Па матэрыялах www.knews.by (Аляксандр Века)