Фотарэпартаж: Пакроўскі кірмаш ў Карме

Традыцыйны Пакроўскі кірмаш адшумеў. Было шмат як гандляроў, так і пакупнікоў. Капусту, моркву, буракі, цыбулю прапаноўвалі фермеры. Сельскагаспадарчыя прадпрыемствы гандлявалі зернем, КСУП “Саўгас “Кармянскі” –  ялавічынай.Шырокі асартымент драўляных вырабаў прадэманстравала камунальнае прадпрыемства. Можна было набыць сурвэткі з ільну, сваю прадукцыю прадавала ткацкая фабрыка.
Мяне вельмі зацікавіў рад, на якім размясціліся прадстаўнікі дзіцячых садоў і школ. Яны гандлявалі гароднінай, сувенірамі, рознымі кухоннымі рэчамі.Прама па вуліцы расцягнуліся гандлёвыя рады раённага спажывецкага таварыства. Тут можна было купіць духмяныя шашлыкі, гарачыя хот-догі, выпіць гарбаты альбо кавы.
Каля раённага цэнтра творчасці дзяцей і моладзі адбыўся канцэрт, у якім прынялі ўдзел вакальны ансамбль “Элегія” Каменскага сельскага Дома культуры, народны вакальны ансамбль “Землякі” з Баравой Буды, “Галасы сэрцаў” з тэрытарыяльнага цэнтра сацыяльнага абслугоўвання насельніцтва.

Забаўлялі народ і дзве кумы. У гэтым вобразе выступалі Вольга Захарэнка і Галіна Кулікова. Вяла праграму Вольга Сафроненка.

Наш праслаўлены народны калектыў з Акцяброўскага цэнтра фальклору “Луца” разам з прадстаўнікамі КСУП “Лепяшынскі” прымаў удзел у сельскагаспадарчай выставе ў Гомелі. Сельгаспрадпрыемства гандлявала цыбуляй і зярном, артысты рабілі музычнае афармленне.

Віктар Ільюшчанка
Фота аўтара