Краязнаўчы каляндар. Ліпень

25 ліпеня 1903 г., 113 год таму, у вёсцы Енцы нарадзіўся беларускі вучоны-дэндролаг, доктар біялагічных навук, прафесар, віцэ-прэзідэнт АН БССР Мікалай Дзмітрыевіч Несцяровіч. Памёр 27 снежня 1984 г. у Мінску.
8 ліпеня 1913 г., 103 гады таму, нарадзіўся будучы Герой Савецкага Саюза Павел Уладзіміравіч Несцяровіч, які ў час бітвы за Дняпро ў кастрычніку 1943 г. са сваім узводам сапёраў здзейсніў подзвіг.
14 ліпеня 1920 г., 96 год таму, ў в. Сырская Буда нарадзіўся будучы беларускі пісьменнік Алесь (Аляксандр Кірылавіч) Астапенка. Аўтар 5 паэтычных зборнікаў, перакладчык з рускай, украінскай, латышскай, літоўскай, украінскай і нямецкай моў. Узнагароджаны ордэнам Айчыннай вайны ІІ ступені.Памёр 20 ліпеня 1970 г.
7 ліпеня 1924 г., 92 гады таму, Кармянская воласць пераўтворана ў Кармянскі раён, у склад якога ўваходзілі 16 сельсаветаў і 159 населеных пунктаў.
У ліпені 1941 г., 75 гадоў таму, адбыўся візіт сакратара абкаму партыі І. П. Кожара на Кармяншчыну з мэтай арганізацыі падполля. З дабраахвотнікаў (193 чалавекі) быў створаны знішчальны батальён на чале з рэдактарам раённай газеты Мікалаем Казіміравічам Ждановічам. Выдадзены таксама загад аб знішчэнні ці падзеле паміж калгаснікамі ўраджаю збожжа, каб не даць яго ворагу.
У ліпені 1942 г., 74 гады таму, сіламі 221-ай ахоўнай дывізіі СС праводзілася карная аперацыя супраць партызан атрада імя К. Я. Варашылава. У выніку зацятых 4-дзённых баёў партызаны былі выціснуты з вёсак Калюды, Кляпін, Струмень, Труд, Малянік і Ясень. Але партызаны, якія трапілі ў акружэнне, паспяхова з яго выйшлі трыма групамі (на чале з Ушавым, Асташонкам і Бруйком).
3 ліпеня 1943 г., 73 гады таму, ў выніку аперацыі “Баграціён” быў вызвалены г. Мінск (цяпер 3 ліпеня адзначаецца свята вызвалення Беларусі, дзень Рэспублікі, Дзень Незалежнасці).
25 ліпеня 1943 г., 73 гады таму, партызанамі групы Караткевіча (10-я Журавіцкая брыгада) быў узарваны мост на шляху Карма – Меркулавічы на развілцы дарог Чачэрск – Карма (каля в. Струкачоў) даўжынёй да 20 м. Пры гэтым вызначыліся партызаны І. Ісаеў, Ж. Караткевіч, Еўстраценка.

Падрыхтаваў Валерый Варганаў,
настаўнік гісторыі Ворнаўскай школы